2008 оны Орос-Гүржийн дайнаар амь үрэгдсэн, энхийг сахиулагчид, энгийн иргэд, цэрэг дайчдын дурсгалыг хүндэтгэх ажиллагаа Өмнөд Осетид болж байна. Цхинвалед яг таван жилийн өмнө зэвсэгт мөргөлдөөн эхэлсэн 7-ны оройн 23,35 цагт  эмгэнэлийн хонх цохиж “дурсгалын амьд зул” гэдэг арга хэмжээг эхлүүлжээ. Хотын төв талбайд цугларсан олонд Өмнөд Осетийн тэргүүн Леонид Тибалов үг хэлж таван жилийн өмнөх тэр эмгэнэлт үйл явдал, тэр үеэр амь үрэгдэн хүмүүс осетийн ард түмний зүрх сэтгэлд үүрд байх болно гэсэн байна.
Өмнөд Осетид суугаа ОХУ-ын Элчин сайд Эльбрус Каргиев тус бүгд найрамдах улсын хүн ардын аюулгүй байдлын баталгааг Орос улс найдвартай хангана гэжээ. Талбайд цугларсан олон нийт  дайнд амь үрэгдэгсдийн дурсгалыг хүндэтгэж тэнгэрт олон мянган зул хөөргөсөн байна.
Яг долоо хоног үргэлжилсэн энэ дайны хохирлын талаар янз бүрээр мэдээлдэг. Гүржийн талын мэдээгээр бол цэргийн 3000  албан хаагч алагдаж, 1964 хүн шархдаж, 9 цэрэг сураггүй алга болсон гэдэг. 100 танк жагсаалаас гарсан байна. Осетийн 365 – 1392 хүн амь үрэгдсэн бол Оросын талаас 64 цэрэг амь үрэгдэж, 283 хүн шархдан гурван хүн сураггүй алга болж, таван хүн олзлогдсон гэдэг.

Харин мэдээллийн MediaNews агентлаг “Энэ дайны явцад Цхинвалын районд оросын 58 дугаар арми 1789 цэргийн албан хаагч, 105 танк, байлдааны 81 машин, 45 хуягт тээвэрлэгч, харвагч “Град” төхөөрөг 10, “Смерч” төхөөрөг 5-ыг алдсан. Энэ бол зөвхөн 58 дугаар армийн хохирол, харин Псковын болон Новороссийскийн десантын дивизийн хохирол тодорхойгүй. Өмнөд Осети-Цхинвалын ОМОН-ы тусгай анги гэхэд л 500 дайчинтай байснаас ердөө таван хүн л  амьд үлдсэн юм шүү дээ” гэж мэдээлсэн байдаг.