АНУ-ын SpaceX компанийн эзэмшигч Элон Маск өчигдөр өндөр хурдны “Hyperloop” системийн тээврийн хэрэгслийн төсөл танилцуулсан байна. Түүнийхээр бол энэ нь аэродинамикийн элемент бүхий хоолойгоор давхих сум маягийн тээврийн хэрэгсэл юм байна. Тээврийн энэ шинэ хэрэгслийг санал болгож үүнийгээ Конкорд онгоц, төмөр замын тээвэр хоёрыг хослуулах хэрэгсэл гэжээ.

“Hyperloop” хэлбэрийн суман галт тэрэг нь  бетон тулгуурууд  дээр тавьсан тусгай хоолойгоор цагт 1220 км хурдалж чадах гэнэ. Тэрээр эхлээд хоорондоо 600 км зайтай Лос-Анжелос, Сан-Франциско хоёрыг холбоход энэ хооронд 35 минут л явна гэж байна. Энэ тээврийн хэрэгслийн бүхий л системийг нарны эрчим хүчээр тэжээх юм байна.

Маскийн хэлж байгаагаар бол энэ хоёр хотын хоорондох замыг тавихад зургаан тэрбум доллар шаардлагатай гэнэ. Тэгээд барьчихсан байхад нэг тасалбарын үнэ сайндаа 20 доллар байна гэж байна.
Маск бас өнөөдөр Калифорни мужийн хэрэгжүүлж байгаа төслийн хүрээнд өндөр хурдны төмөр зам тавихад харин 70 тэрбум доллар хэрэгтэй гэжээ.

“Өндөр хурдны галт тэрэг бол удаан, бас үнэтэй” гэж хөрөнгө оруулагч тэмдэглэсэн байна. Тэгээд ч өндөр хурдны зам барихад наад зах нь 10 жил зарцуулна шүү дээ гэж нэмжээ.

Ийм болохоор бизнесмэн энэ шинэ төслөө танилцуулаад, энэ бол цааш нь хэн ч үргэлжлүүлээд боловсронгуй болгож болох нээлттэй төсөл гэжээ. Одоогоор зөвхөн төсөл төдий 56 хуудас байгаа үүнийг нь  хэн ч сонирхохгүй, үргэлжлүүлэхгүй бол тэр өөрөө ажлын хэсэг байгуулан зураг төсөлдөө орно гэсэн байна.