Японы Кагошима мужийн Утиноура сансрын хөөргөх буудлаас "Эпсилон" нэртэй шинэ үеийн пуужин хөөргөгч хөөрөхөд бэлэн болжээ. Японы зохион бүтээгчид “цаг хэмнэх”, “хүн хүчний нөөц хэмнэх”, “тоног төхөөрөмж хэмнэх” гэсэн гурван зарчмыг гол болгон 12 жилийн турш ажилласны дүнд “Эпсилон”-ыг бүтээсэн юм байна. Шинэ пуужингийн өндөр нь 24,4 метр байгаа нь хуучин ашиглаж байсан “Н2А” пуужингаас хоёр дахин бага аж. Хуучин пуужин хөөргөхөд бэлдэхэд бүтэн сар шаардлагатай байсан бол шинийг бэлдэхэд долоо хоног хангалттай. “Н2А” пуужин удирдахад хэдэн арван хүн шаардлагатай байсан бол "Эпсилон"-ыг хоёрхон компьютерээс удирдах боломжтой. Шинэ пуужингийн үнэ 38 сая ам.доллар бол хуучин пуужингийнх 100 сая ам.доллар орчим байжээ.
“Эпсилон” пуужин нь шинжлэх ухааны судалгааны "SPRINT-А" хиймэл дагуулыг тойрог замд гаргах аж. Энэ хиймэл дагуул нь хэдэн мянган км-ийн өндөр тойрог замд гарсны дараагаар Ангараг ба Сугар гаригын талаарх мэдээлэл цуглуулах, газрын гадаргад хүрэлгүйгээр агаар мандалд шингэдэг хэт ягаан туяаны талаар судалгаа хийнэ.
