АНУ-ын Ерөнхийлөгч Барак Обама Сирид химийн зэвсэг хэрэглэсэнтэй холбогдуулан ямар хариу барих талаар одоохондоо ямар нэгэн шийдвэр гаргаагүй байна гэж мэдэгдсэн байна. Цэргийнхэн түүнд Сирид довтлох төлөвлөгөөг танилцуулсан гэж ерөнхийлөгч хэлээд одоо би Үндэсний аюулгүй байдлын зөвлөлтэй зөвлөлдөж байгаа гэжээ. Обама бас Сирид довтлох нь өнөөгийн нөхцөл байдлыг сайжруулахад нэг их тус болохгүй байж мэдэх юм гээд тус улсын дотоодын мөргөлдөөн самууныг зогсоож тогтворжуулахад ОХУ-тай хамтран ажиллахад бэлэн байгаагаа илэрхийлжээ.
Энэ сарын 21-ний өдөр нийслэл Дамаскийн ойролцоо химийн зэвсэг хэрэглэсэн үйлдэлд ямар нэгэн хариу заавал өгнө гэж Америкийн засаг захиргаа үүний өмнө мэдэгдэж байсан юм.  “Хил хязгааргүй эмч нар” байгууллагын мэдээллээр бол химийн энэ дайралтад  нийтдээ 3,5 мянган хүн  өртөж, 355 нь амь алдсан юм.
Их британи улс Сирийн эсрэг цэргийн ажиллагаа явуулах тухай тогтоолын төсөл боловсруулж НҮБ-ын Аюулгүйн зөвлөлд оруулсан ч Орос, Хятад эсрэг санал өгснөөр энэ тогтоол батлагдаагүй юм.
Одоо Сирид НҮБ-ын шинжээчид ажиллаж Дамаскийн ойролцоо химийн зэвсэг хэрэглэсэн талаар нотлох баримт цуглуулж байгаа юм. Тэд хөрс, агаараас дээж авахын зэрэгцээ гэрчүүдээс мэдүүлэг авч байна.
НҮБ-ын ерөнхий нарийн бичгийн дарга Пан Ги Мун  ч шинжээчдэд гарцаагүй нотлох баримт олж, мэдээллээ баталгаажуулан, илтгэл бэлтгэх цаг хугацаа олгохыг уриалсан юм.