Кайрон Норман хүү 2010 оны зургадугаар сарын 4-ний өдрөөс хойш алга болоод олдоогүй ч түүний ээж бууж өгөхгүйгээр шийджээ. Десирии Янг гэх энэ эмэгтэй 100 гаруй сайн дурынхны хамтаар хоёр өдрийн турш тасралтгүй хайсан талаараа хэвлэлийн бага хурлын үеэр хэлсэн байна. Эрэн сурвалжлах үйл ажиллагаа 10 мөрдөгч нохойг хамруулан алга болсон бүсээс нь хайж эхлэсэн гэнэ. Дөнгөж 7 настайдаа сураггүй болсон бяцхан хүүтэй хамгийн сүүлд хамт байсан хүн нь түүний хойд ээж Терри Норман бөгөөд хүүг сургуулиас нь аваад хамт явж байтал нэг мэдэхэд алга болчихсон байсан гэж цагдаад мэдэгдсэн байна. Ингээд цагдаагийн ажилтнууд Терриг сэжиглэж байсан ч баттай нотолгоо олдоогүй. Гэвч Кайроны аав Терриг энэ явдалд холбоотой гэж үзэж буйгаа хэд хэдэн удаа илэрхийлжээ. Ямартай ч хатагтай Янг энэ удаа хүүгээ заавал олно гэдэгт тун итгэлтэй байна.
