АНУ, ОХУ-ын тал Сирийн химийн зэвсгийг устгах талаар тохиролцож чадлаа. Хоёр улсын тохироогоор бол Сири өөрийн эзэмшилд байгаа 1000 тонн химийн зэвсгийнхээ талаар бүрэн мэдээллийг долоо хоногийн дотор хүлээлгэн өгөх ёстой. Хэрэв Башар Ал Ассад энэ үүргийг биелүүлж чадахгүй бол НҮБ-аас тус улсад хориг тавина гэдгийг АНУ-ын Төрийн нарийн бичгийн дарга Жонн Керри болон Оросын Гадаад хэргийн сайд Сергей Лавров нарын гурав хоногийн турш Женевт хэлэлцэн тохиролцсоны дагуу байгуулсан гэрээнд заажээ. Сириэс хурааж авсан химийн зэвсгийг ирэх оны эхний хагаст багтаан устгахаар төлөвлөж байна.

Ийнхүү АНУ-ын Сири рүү довтолж магадгүй байсан болзошгүй дайны аюулыг цаашлуулсан Оросын санаачилгад олон улс талархаж байна. Сирийн зүгээс ч энэхүү гэрээг сайшаан дэмжиж, орос анд нартаа баярлаж байгаагаа илэрхийлсэн бол харин Сирийн босогчид гэрээг шүүмжилж байна. Одоо гагцхүү Башар Ассад олон улсын өмнө өгсөн амлалтаа биелүүлвэл Ойрхи Дорнодод дахин нэг дайны гал дүрэлзэхгүй байх боломж олдлоо.