Эрчим хүчний яамны Төрийн нарийн бичгийн дарга Д.Дэлгэрцогт өнгөрсөн долоо хоногт Японы Аж үйлдвэр, худалдааны яамтай хамтран ажиллах санамж бичигт гарын үсэг зурав. Тодруулбал, Монгол Улсад Японы талаас алдагдал багатай цахилгаан дамжуулах, түгээх систем нэвтрүүлэх ажлын эхлэл ийнхүү нээгджээ. Санамж бичгийг тус улсын АҮХЯ-ны харьяа Шинэ технологи, үйлдвэрлэлийн хүрээлэнгийн ерөнхийлөгч Курота Кёнжи гарын үсэг зурж баталгаажуулав.

Энэ оны нэгдүгээр сарын 8-нд Монгол, Японы байгаль орчны яамдын хооронд хүлэмжийн хийг бууруулах чиглэлд хамтран ажиллах ерөнхий хэлэлцээр байгуулсан. Түүний үйл ажиллагааг шат ахиулах санамж бичиг нь өнгөрсөн долоо хоногт тохиосныг албаны хүмүүс онцолж байна. Шинэ санамж бичгийн хүрээнд Оюу толгой, Цагаан суварга чиглэлд 220 кВ-ийн өндөр хүчдэлийг алдагдал багатайгаар хүргэх 160 км хос шугам татах юм. Уг ажлын зардлыг Японы талаас санхүүжүүлж 2014 оны есдүгээр сарын 30-нд ашиглалтад хүлээлгэн өгөхөөр тохирчээ. Ийнхүү япончуудаар хийлгэх ээлжит ажлын тов, төлөвлөгөө бэлэн болж байгаа ч хөрөнгө санхүүжилт хэзээ эргэн төлөгдөхийг нууцаллаа. Хос шугам ашиглалтад орсноос хойш алдагдлыг харьцуулан тооцоолж, орон нутгийн өөр чиглэлд нэмж байгуулан, ашиглахаар төлөвлөсөн байна.