АНУ-ын Зэвсэгт хүчний стратегийн удирдах газрын даргын орлогч дэд адмирал Тимоти Жардинаг ажлаас нь халж, цол бууруулсан тухай “ВВС” агентлаг мэдээлж байна. Энэ талаар холбогдох албад Тимоти Жардинаг үүрэгт ажлаас нь чөлөөлөн Тэнгисийн цэрэг, хууль хамгаалах байгууллагууд шалгаж байгаа гэхээс өөр нэг тайлбар өгөөгүй.
Гэтэл дэд адмиралыг Небраска мужийн Омаха дахь казинод покер тоглохдоо хуурамч хасаа ашиглан их хэмжээний мөнгө луйвраар хожсон гэж ажлаас нь халсан болохыг “Omaha World Herald” сонины сэтгүүлчид тогтоосон байна. Энэ казино нь Жардины алба хаадаг байсан цэргийн баазаас холгүй байрладаг байж.
Америкийн Стратегийн хүчний удирдлага гэдэг нь хуурай газар байрладаг баллистик пуужин, шумбагч завин дээрх пуужин, цэргийн нисэх хүчний цөмийн бөмбөг гэсэн Америкийн цөмийн гурвалсан хүчийг удирдах, бэлэн байдлыг нь хангах үүрэгтэй. Иймд энэ албанд ажиллаж байгаа хүмүүс хатуу хяналтын дор байдаг.
