Дэлхийн хамгийн нөлөө бүхий 500 хүний нэг, Оросын хамгийн баян 200 хүний жагсаалтад долдугаар байранд орсон тэрбумтан Владимир Потанин Нью-Йорк хотын зоогийн газраас 95 мянган ам.доллараар газрын цагаан мөөг худалдан авсан тухай “The New York Post” сонин  мэдээлэв. “Choiromyces meandriformis” гэсэн шинжлэх ухааны нэртэй газрын цагаан мөөг нь хэмжээ, гадаад байдлаараа төмстэй төстэй бөгөөд өрнөд Европ, Украйн, Беларусийн ойд ургадаг. Энэ төрлийн мөөгийг өрнөд зүгт хамгийн чамин тансаг амттан гэж асар өндөр үнэлдэг.
Ийм мөөгний нэг кг нь л хэдэн арван мянган ам.долларын үнэ хүрэх нь энгийн зүйл. Хамгийн том цагаан мөөг Италийн Сан-Миниатогоос олдсон  байдаг бөгөөд 2,5 кг жин татаж байжээ.
Ийм өндөр үнээр газрын мөөг худалдан авсан Потанин “Норильскийн никель” компанийн захирал бөгөөд 14 тэрбум ам.долларын хөрөнгөтэй нэгэн юм байна.