Сирийн Дамаск хотын лалын шашинтнуудын дунд ихээхэн нөлөөтэй хэд хэдэн зүтгэлтнүүд өлсч байгаа хүмүүсийг муур, нохойн мах идэвхийг зөвшөөрсөн айлтгал гаргасан байна. Лалын шашинд зөвхөн хатуу шаардлагын дагуу муулсан малын мах идэхийг зөвшөөрдөг хатуу хуультай. Ийм хуулийн дагуу бэлтгэсэн хүнсний бүтээгдэхүүнийг “халяль” бүтээгдэхүүн гэж тусгайлан нэрлээд энэ төрөлд багтаагүйг хэрэглэхийг хориглодог. Жишээлэхэд, гахайн мах, согтууруулах ундаа, малын цусаар хийсэн бүтээгдэхүүн нь халяль биш болохоор лалын шашинтан хүн хүнсэндээ хэрэглэх хориотой.

Дамаскийн лалын шашны том зүтгэлтнүүд ийм өвөрмөц айлтгал гаргаснаараа дэлхийн анхаарлыг Дамаск хотод нүүрлээд байгаа өлсгөлөнгийн асуудалд татах зорилготой гэнэ. Тэдний мэдэгдэж байгаагаар сая хүн амьдардаг хотыг өлсгөлөнгөөс аврах талаар яаралтай арга хэмжээ авч эхлээгүй тохиолдолд ойрын үед хотод хүний мах идэх хэмжээнд хүрч магадгүй болжээ.

Сирид иргэний дайн эхлэхээс өмнө Дамаск хотын иргэд ойролцоох хөдөө орон нутгаас жимс, мах гээд хэрэгцээд хүнсний бүтээгдэхүүний дийлэнх хэсгийг авдаг байжээ. Харин иргэний дайн эхэлсний дараа босогчид Дамаскийг тойрсон олон жижиг хот, тосгоныг эзлэн авснаар хүнсний бүтээгдэхүүний нийлүүлэлт тасарсан байна. Үүнээс болж хар зах дээрх хүнсний бүтээгдэхүүний үнэ хэдэн зуу дахин нэмэгдсэн аж. Башар Асадын Засгийн газар энэ таагүй үзэгдэлтэй тэмцэхийн тулд хүнсний бүтээгдэхүүн дамлан худалдаалсан хүнд эрүүгийн хариуцлага хүлээлгэдэг болсон ч байдал одоо болтол дээрдээгүй байна.