McDonald’s түргэн хоолны сүлжээ 40 жилийн турш хэрэглэж, хоолных нь жорны салшгүй хэсэг мэт болсон Heinz кетчупнээс татгалзжээ. Гэхдээ энэ нь Heinz –ийн бүтээгдэхүүний чанартай огтхон ч холбоогүй харин өрсөлдөгчтэй хамтрахгүй гэсэн санаа аж. McDonalds’-ын өрсөлдөгч “Burger King”-ийн хуучин захирал Бернардо Хиз “Heinz” компанийн гүйцэтгэх захирал болоод удаагүй байгаа юм. Heinz компанийг тэрбумтан Уоррен Баффетын “Berkshire Hathaway” болон Бразилийн хөрөнгө оруулалтын “3G Capital” сан 28 тэрбум ам.доллараар худалдан авсан билээ. “3G Capital” нь “Burger King”-ийг хянадаг юм. Тийм ч учраас томоохон өрсөлдөгчөө өөрийнхөө нийлүүлэгч болгохгүйн тулд McDonald’s дэлхий даяар тарсан 34 мянган сүлжээ ресторандаа Heinz-ийн кетчуп тэргүүтэй бүтээгдэхүүнийг хэрэглэхээ болихоор шийдсэн байна.  Гэхдээ тэд 40 жилийн уламжлалтай бизнесийн харилцаагаа гэнэт таслахгүйгээр, зохистойгоор төгсгөж, өөр шинэ бүтээгдэхүүн хэрэглэгчдэдээ санал болгохоор судалж байгаа аж.