Ливийн төв банкны мөнгөний машин руу  зэвсэглэсэн этгээдүүд халдаж 54 сая доллар дээрэмдсэн хэрэг өчигдөр гарчээ. Сирт хотоос нисэх буудал хүрэх замд явж байсан банкны машин руу зэвсэг бүхий 10 хүн халдах үед тэнд ганцхан хамгаалагч явж байсан байна. Машинд 42 сая доллартай тэнцэх ливийн 53 сая динар, гадаадын 12 сая доллар тээж явжээ.
Дээрэмчид хэргийн газраас тэр дороо зугтаж нуугдсан байна. Сирт хотын хүчний байгууллагынхан дээрэмчдийн  машины дугаарыг тэмдэглэж чадсан гэж мэдэгдээд эрэн сурвалжилж байна. Сирт хотод өнгөрсөн долдугаар сард хоёр ч банкыг дээрэмдэж 400 мянган доллартай тэнцэх динар дээрэмдсэн хэрэг гарсныг өнөө болтол илрүүлж чадаагүй байгаа юм.