Бүрэн эрх нь арваннэгдүгээр сард дуусах Гүржийн ерөнхийлөгч Михаил Саакашвили даваа гарагт ард түмэндээ хандаж үг хэлсэн байна. Тэрээр телевизээр хэлсэн үгэндээ “Миний ерөнхийлөгч байх хугацаа дуусч байгаа болохоор энэ бол миний ерөнхийлөгчийн ордноос ард түмэндээ хандаж байгаа сүүлчийн тохиолдол” гэсэн байна. Тэр бас улс орноо удирдах боломжийг хоёр удаа олгосон ард түмэндээ талархснаа илэрхийлжээ. “10 жилийн өмнө би та бүхэнд ирээдүй рүү алхлахыг уриалж байсан, гэхдээ төгсгөлд нь хүрнэ гэж амлаагүй. Энэ бол өнөөдрийг бий болгосон гайхамшигт аялал байлаа. Энэ бүхэн та бүгдэд өнөөдөр мэдрэгдэж байгаа” гэж албаа өгөх гэж байгаа ерөнхийлөгч хэлжээ. Саакашвили  өөртөө амралт хэрэггүй гээд харин “Та бүхэн надаас холдож амрах цаг болсон” гэжээ.