“Палестины удирдагч агсан Ясира Арафат хордож үхсэн хэргийн ард Израиль байгаа” гэж Палестины мөрдөн байцаагчид мэдэгдлээ.

Арафатын цогцосноос хүчтэй цацраг идэвхт бодис илэрсэнтэй холбогдуулан Баруун эргийн Рамалла хотод болсон хэвлэлийн бага хурал дээр тэд ийн мэдэгдсэн юм.

2004 онд Арафатыг нас барснаас хойш, түүнийг хордуулсан байж магадгүй гэж таамагласаар ирсэн билээ.

Харин энэ долоо хоногийн эхээр Арафатын цогцосноос хэвийн хэмжээнээс 18 дахин их полони илэрсэн гэж Швейцарийн шүүх эмнэлгийн шинжээчид мэдэгдсэн.

Шүүх эмнэлгийн дүгнэлтээс үзвэл, тэрбээр өвчний улмаас эсвэл жам ёсоор нас бараагүй, хордсон болох нь тодорхой байна гэж Палестины мөрдөн байцаагчид үзэж байна.

“Арафатын үхэлд цорын ганц сэжигтэн бий. Түүний үхлийн ард Израилийн Засгийн газар байгаа” гэж тэд хэллээ. Хэн, яаж түүнийг хөнөөснийг бид цаашид илүү дэлгэрэнгүй мөрдөн шалгах болно гэж тэд хэлсэн байна.

Харин Арафатын үхэлд ямар ч холбоогүй гэж Израилийн Засгийн газар мэдэгддэг юм.