ОХУ-ын нийслэл Москва хотын төвд яг Кремлийн хажууд байрладаг байсан “Россия” зочид буудлын буурин дээр “Зарядье” цэцэрлэгт хүрээлэн байгуулах төсөлд  америкийн зураг төслийн Diller Scofidio + Renfro товчоо шалгарчээ.
Өнгөрсөн оны нэгдүгээр сард Москва хотын мэр Сергей Собянин  Путинтай уулзахдаа энэ буурин дээр орчин үеийн цэцэрлэгт хүрээлэн байгуулна гэж мэдэгдсэн юм.

Төсөл шалгаруулах шүүгчдийн нэг Испанийн их сургуулийн уран барилга, дизайны сургуулийн гадаад харилцаа хариуцсан декан Марта Торно “Энэ бол XXI  зууны цэцэрлэгт хүрээлэнгийн загвар болно. Москва ингэснээр хотынхоо төвд шинэ маягийн цэцэрлэгт хүрээлэнтэй болно” гэсэн байна.
Энэ оны дөрөвдүгээр сараас зарласан цэцэрлэгт хүрээлэн байгуулах энэ төслийн шалгаруулалтад дэлхийн 27 орны 450 компаниас 87 төсөл мэдүүлэг ирсэн юм байна.

Энэ төслийг хэрэгжүүлэхэд нийтдээ 10 тэрбум рубль буюу 305 орчим сая доллар зарцуулах юм.
Энд манай гаригийн томоохонд орох 5300 хүн нэгэн зэрэг байрлах 3182 өрөөтэй 12 давхар “Россия” зочид буудал байсан юм. 1964-1967 онд барьсан, дөрвөн ч корпусаас бүрдэх, 23 давхар цамхагтай концертын танхим, спорт цогцолбор гээд бүхий л үйлчилгээтэй тансаг энэ буудлыг 2006 онд хааж, дараа нь буулгасан юм. Кремльтэй ойр байснаас барилгыг дэлбэлээгүй харин цамхагт краны  тусламжтайгаар  буулгасан гэдэг.
Одоо энэ суурин дээр 200-300 машины зогсоол, концертын талбай бүхий иж бүрэн цэцэрлэгт хүрээлэн байгуулах нь.