Гоо сайхны мэс заслаараа алдартай Өмнөд Солонгост бүхий л төрлийн гоо сайхны мэс засалд татвар тооцохоор болжээ. Тус улсын Санхүү эдийн засгийн яамнаас өнөөдөр энэ тухай албан ёсоор зарлахдаа шинэ татварыг парламентаар хуульчлан тогтоох шаардлагагүй, яамны шийдвэр ирэх оны эхнээс хүчин төгөлдөр мөрдөгдөнө гэсэн байна. Яамны мэдэгдэж буйгаар сорвио засуулах, нүдний хараа сайжруулахаас бусад бүхий л төрлийн гоо сайхны мэс ажилбар, мэс заслыг нэмүү өртгийн татварт хамруулан тооцох ажээ. Мэдээж энэ салбарынхан уг шийдвэрийг эсэргүүцэж, Солонгос давалгааг дэлхий даяар түгээх чухал хэрэгсэл болж байгаа гоо сайхны мэс засалд чөдөр тушаа болох хэрэггүй гэлцэж байна. Гэвч тус улсын Засгийн газар улам бүр багасч байгаа татварын орлогыг нэмэгдүүлэх бодлого барьж, сүм хийдүүдээс хүртэл татвар хурааж эхэлсэн юм.
Өмнөд Солонгост гоо сайхны мэс засал хийдэг 1250 мэргэжилтэн бүртгэлтэй байдаг бөгөөд тэд жилдээ 700 гаруй мянган хүнд үйлчилдэг байна.