АНУ-ын баруун эргийг дайрсан далайн хүчтэй шуурганы улмаас найман хүн амиа алдаад байгаа тухай мэдээллийн агентлагууд мэдээлж байна. Бямба гарагийн шөнөөр Калифорни, Невада, Аризона, Нью-Мексико мужыг  дайрсан шуурганы улмаас агаарын температур эрс хүйтэрч, цасан шуурга дэгджээ. Цас мөсөнд дарагдсан зам дээр олон арван осол гарсан тухай нэр гарсан мужуудын замын цагдаагийн албад мэдээллэв. Салхины хурд зарим газар цагт 88 км хүрч байсан болохоор олон тооны ургаа мод, сурталчилгааны самбар, цахилгааны шон нурсан байна. Мөн ихээхэн хэмжээний цас, борооны улмаас зарим газар үерт автжээ.