Энэтхэгийн Тамилнад мужид оросуудын барьж өгсөн “Кунданкулум” цөмийн цахилгаан станцын ажиллагааг эсэргүүцсэн хүмүүс баривчлагдсан байна. Баривчлагдсан хүмүүс цөмийн цахилгаан станцаас 15 км-ийн зайтай газар тэсрэх бодис дэлбэлэн зургаан хүн, түүний дотор гурван хүүхдийн амийг хөнөөсөн хэрэгт буруутгагдаж байгаа аж.

Баривчлагдсан хүмүүс нь цөмийн эрчим хүчийг ашиглахын эсрэг үйл ажиллагаа явуулдаг “Ард түмэн цөмийн эрчим хүчний эсрэг” нэртэй төрийн бус байгууллагын үүсгэн байгуулагчид юм байна. Энэ байгууллагын гишүүд нь” Кунданкулум” цахилгаан станцыг баригдаж байх үед эсэргүүцлийн хөдөлгөөн явуулдаг байсан бөгөөд өдгөө ашиглатад ороод ажиллаж байгаа станцыг зогсоохын төлөө үйл ажиллагаа явуулж байгаа. Энэтхэгийн Засгийн газар нь тус байгууллагын явуулж байгаа үйл ажиллагааг Америк, Өрнөд Европоос санхүүжилт авдаг Энэтхэгийн эсрэг гэж мэдэгдээд байсан билээ.

Энэтхэг цахилгаан ба дулааны хэрэгцээнийхээ дийлэнхийг нүүрсээр ажилладаг цахилгаан станцуудаас гарган авдаг. Нүүрснийхээ дийлэнхийг импортлон оруулж ирдэг улс. Иймд энэ хамаарлыг арилгахын тулд цөмийн цахилгаан станц барихад онцгой анхаарч байгаа юм. Дээр нэр гарсантай адил гаднаас санхүүждэг байгууллагууд нь цөмийн цахилгаан станц барих ажлыг Оросын компанид өглөө гэж бухимдсан гуравдагч талын явуулга гэдэгт Энэтхэгийн  эрх баригчид итгэлтэй байгаа юм.