Украины жагсагчид өчигдөр нийслэл Киев дэх В.И.Лениний хөшөөг унагаж, оронд нь Европын холбооны тугийг хатгажээ. Боржин чулуугаар хийсэн “их багшийн” энэ хөшөө 1946 оноос хойш өдийг хүртэл хадгалагдсаар ирсэн ч Ерөнхийлөгч В.Янукович болон түүний Засгийн газар Европын холбооноос зай барьж, хуучин ах дүүгийн барилдлагатай ОХУ-тай дотносч эхэлсэн нь украинчуудад Оросыг үзэн ядах сэтгэгдэл төрүүлж, улмаар Лениний хөшөөнд хүртэл гар хүрэв. Гэхдээ украинчууд энэ хөшөөг түүхийн үнэт дурсгал гэдгийг өөрсдөө ч ухамсарлаж байгаа нь хөшөөний үйрсэн хэсгээс авч, хадгалж байгаагаас харагдаж байжээ.
Хөшөөг унагаж, сүйрүүлсэн нь соёлын дурсгалд балмадаар халдсан хэрэг хэмээн Украины Засгийн газар үзэж байна. Засгийн газрын эсрэг жагсаал цуглаан зохион байгуулж буй сөрөг хүчний удирдлагууд ч энэ явдлыг таашаахгүй байна. Тэд энэ хэрэгт ямар ч холбоогүй, зохион байгуулахад нь оролцоогүй гэж мэдэгдэж байгаа юм.