Католик шашны тэргүүн, Ромын пап лам Франсуа  энэ оны онцлох хүнээр шалгарлаа. “Тime” сэтгүүлээс жил бүр тодруулдаг оны онцлох хүний шалгаруулалтад тэрээр олон нийтээс хамгийн өндөр санал авсан 10 нэр дэвшигчийн нэг болсны зэрэгцээ сэтгүүлийн эрхлэгчид ч түүний энэ жил бүтээсэн үйл хэргийг онцгойлон үзжээ. Католик шашны тэргүүнээр есөн сарын өмнө заларсан Аргентинаас гаралтай  пап лам шашны тэргүүний үүрэг роль ямар байх ёстойг жил хүрэхгүй хугацааны дотор харуулж чадсан хэмээн үнэлж байна. Тэрээр сүмд мөргөл үйлдэж, сургааль айлдах биш, гудамжинд гарч, эгэл жирийн сүсэгтэн олонтой хамт байснаараа өмнөх үеийн папуудаас эрс ялгарсан гэж “Time” сэтгүүлд бичжээ.  Пап лам шоронгийн залуу хоригдлуудын хөлийг өөрийн гараар угаахдаа хөлийг нь үнсч, сэтгэц мэдрэл болоод бие эрхтний гажигтэй хүмүүсийг цээрлэлгүй тэвэрч, тэднийг мутраараа адислаж байсан нь тухайн үедээ олныг гайхашруулан бишрүүлж байв. Ийнхүү пап лам өндөр дээд суудлаасаа бууж ирж, эгэл ардын дунд орж ирсэн нь энэ оны дэлхийн онцлох хүн болох хангалттай шалтгаан мөн хэмээн “Time” сэтгүүл үнэллээ.