Манай гаригийн нэртэй эрдэмтэд, Google компанийн инженерүүдтэй хамтран боловсруулсан программаар хүн төрөлхтний түүхэнд хамгийн их нөлөө үзүүлсэн түүхэн 2000 хүний жагсаалт гаргахад Монголын эзэнт гүрнийг байгуулж, дэлхийн талыг эзэлж явсан Чингис хаан 38-д орсон байна. 
Жагсаалтыг Иисус Христос тэргүүлсэн бол Наполеон Бонапарт удаалж харин гэгээн Мухаммед гуравт оржээ. Эдний араас английн яруу найрагч Уильям Шекспир, АНУ-ын ерөнхийлөгч асан Авраам Линкольн нар орж айргийн тавд багтсан байна.

Фашизмыг үндэслэгч Адольф Гитлер жагсаалтын долдугаарт орсон байхад зөвлөлтийн удирдагч Иосиф Сталин 18 дугаарт жагссан байна.

Эмэгтэйчүүдээс хатан хаан Елизавета I, хатан хаан Виктория, Францын Жанна д’ Арк гурав түүхэнд хамгийн их үүрэг гүйцэтгэсэн эмэгтэй болж жагсаалтын эхний зууд багтжээ. Саяхан ертөнцийн мөнх бусыг үзүүлсэн, ӨАБНУ-ын ерөнхийлөгч асан Нельсон Мандела энэ жагсаалтын 356 дугаарт орсон байна.



Жагсаалтын эхний 20-д багтсан, хамгийн нөлөө бүхий түүхэн хүмүүс:

1.    Иисус Христос
2.    Наполеон
3.    Мухаммед
4.    Уильям Шекспир
5.    Авраам Линкольн
6.    Жорж Вашингтон
7.    Адольф Гитлер
8.    Аристотель
9.    Александр Великий
10.    Томас Жефферсон
11.    Генрих VIII
12.    Чарльз Дарвин
13.    Елизавета I
14.    Карл Маркс
15.    Юлий Цезарь
16.    Хатан хаан  Виктория
17.    Мартин Лютер Кинг
18.    Иосиф Сталин
19.    Альберт Эйнштейн
20.    Христофор Колумб
 Энэ программыг боловсруулсан эрдэмтдийн нэг болох Нью-Йоркийн “Стони Брук” их сургуулийн компьютерийн программын профессор Стивен Скиен энэ алгоритм түүхэн өгөгдлүүдийг ашиглан жагсаалтыг гадны нөлөөнөөс ангид хамгийн оновчтой гаргасан гэсэн байна.
Түүхэн хүмүүсийн рейтингийг тогтоохдоо янз бүрийн олон шалгуур үзүүлэлт баримталсны дотор нэрд гарсан байдал, ололт амжилтын талаарх тоо баримт, өнөө цагт тэднийг хэрхэн дурсч байгаа талаарх ном, өгүүлэл зэргийг харгалзжээ. 
Алдарт Бетховен 27, Бах 48-д жагссан бол Моцарт арай өмнө 24 дүгээрт орсон гэнэ.
Судлаачдын хэлж байгаагаар бол энэ 2000 хүний гуравны нэг нь л гэхэд орчин үеийн хүүхэд багачуудын хувьд огт мэдэхгүй хүмүүс байгаа гэнэ. Орчин үеийн поп одуудаас гэхэд л Эльвис Пресли 69, Мадонна 121, Боб Дилан 130, Жон Леннон 162 дугаар байрт оржээ.