Санхүүчид дэлхийн эдийн засгийн төлөв байдлын талаар өөдрөг үзэлтэй байгааг “Bloomberg”-гээс явуулдаг санал асуулга харуулсан байна. Санал асуулгад оролцогсдын 40 хувь нь дэлхийн эдийн засаг хөгжиж байна гэсэн бол 43 хувь нь тогтвортой гээд дөнгөж 12 хувь нь л уналтын байдалтай байна гэж үзжээ.
“Bloomberg” 2009 оноос эхлэн улирал болгон өөрийнх нь үйлчилгээг авдаг банкны эзэд, худалдаачид, мөнгөний гүйлгээ хийдэг менежерүүдээс дэлхийн болон бүс нутгийн эдийн засгийн хэтийн төлөвийг асуудаг болсон.

Хамгийн сүүлийн санал асуулгад оролцсон мэргэ­жилтнүүдийн 44 хувь нь хөрөнгө оруулалт хийхэд хамгийн таатай улс Америк гэжээ. Харин 32 хувь нь Европын холбооны эдийн засгийг хоёрдугаарт явна гэж үнэлсэн байна. Гэхдээ Европын холбоонд үүсч магадгүй дефляци буюу мөнгөний ханш нэмэгдэхээс түгшиж байгаа гэдгээ хэлжээ. Асуулгад оролцсон хүмүүсийн 75 хувь нь дефляцийг инфляцаас илүү аюултай гэж мэдэгдсэн. Үүний дээр Португаль гэх мэтийн зарим улс дефляцийн бүсэд ороод эхэлсэн байгаа нь түгшүүр төрүүлж байгаа гэнэ. Европын холбооны 18 орны нийт инфляцын хэмжээ дөрөвдүгээр сард 0,7 хувь байсан нь төлөвлөөд байсан хоёр хувийн инфляц гэдгийн дөнгөж гуравны нэгд хүрч байгааг анхааруулсан аж.

Манай урд хөршийн эдийн засгийн төлөв байдлын хувьд асуулгад оролцогсдын дийлэнх нь 2012 оны есдүгээр сараас хойш хамгийн муу байдалтай байна гэжээ. Ингэхдээ есөн хувь нь Хятадын эдийн засаг сайжирч байгаа гэсэн бол 47 хувь муудаж байгаа, 41 хувь нь тогтвортой байгаа гэж дүгнэжээ. Хятадын удирдлагын нэн тэргүүнд хэрэгжүүлэх ёстой зүйлийн тоонд авлигатай тэмцэх, хүнд байдалд орсон санхүүгийн салбараа анхаарах гэсэн байна.
Харин манай хойд хөршийн тухайд асуулгад хамрагдсан 10 хүн тутмын долоо нь эдийн засаг нь унаж байгаа гэсэн бол нийт оролцогсдын 45 хувь нь Украйны үйл явдалтай холбоотойгоор Оросын компаниудын хувьцааг зарахыг зөвлөжээ.