Испанийн томоохон хотуудад өнгөрсөн амралтын өдрүүдээр жагсаал цуглаан тасарсангүй. Испанийн залуу үеийнхэн эрх баригчдынхаа бодлогыг эсэргүүцэж нийслэл Мадридаас эхлээд Барселон, Валенсиа зэрэг хотод жагсчээ. Сүүлийн хоёр жил эдийн засгийн хямралд нухлагдаж буй тус улсад “Indignants” буюу Бухимдагчдын хөдөлгөөн хэмээх бүлэг бий болж, эдийн засгийн үр дүнгүй бодлого явуулж буй эрх баригчдын эсрэг тэмцдэг болоод буй. Тус хөдөлгөөний нэг жилийн ой маргааш болох бөгөөд үүнийг угтаж дээрх жагсаал цуглаануудыг зохион байгуулжээ.  
Мадрид хотын хамгийн том талбай Пуерта дел Солд жагсагчид цуглаж амралтын хоёр өдөр эсэргүүцлээ илэрхийлсэн байна. Тэд хууль ёсоор тараагүйгээр барахгүй оролцогчдын тоо нь улам нэмэгдэж байжээ. Цуглаанд оролцогчдын дийлэнх нь ажлын байр олдохгүй, ажил хийхийн тулд Европын бусад орныг зорих ёстой болж байгаад бухимдаж буйгаа илэрхийлж байжээ. Испанийн  ажилгүйдлийн төвшин 24 хувь хүрээд байгаагаас 25-аас доош насны залуусын 50 хувь нь ажилгүй байгаа юм.