Европ тивийн урлаг соёлын хамгийн том наадам болох “Eurovision” тэмцээнд Шведийн дуучин Лорин “Euphoria” дуугаараа түрүүллээ. “Swedish Idol” шоу тэмцээний ялагч болсноор улсдаа шинэ од болон тодроод байгаа Лорин “Eurovision”-д ч анхнаасаа рейтинг өндөртэй явсан юм.  Азербайжаны нийслэл Бакуд зохион байгуулагдсан “Eurovision”-ы 57 дахь наадмын финалын шатанд 26 орон өрсөлдсөнөөс Швед, Орос Серби, Азербайжаны оролцогчид үзэгчдээс хамгийн өндөр үнэлгээ авчээ.
“Eurovision”-ы ялагчийг тодруулахдаа олон нийтийн теле санал асуулгын дүнг харгалзан үздэг юм. Энэ удаагийн наадмыг Европ даяар 125 сая хүн шууд хүлээн авч үзсэнээс Лорин 325 оноогоор бусдыгаа тэргүүлсэн байна.  Үзэгчид, ялангуяа оросууд “Бурановские бабушки” хамтлагаа хүчтэй дэмжиж байсан ч эмээ нар энэ удаа хараахан тэмцээнд түрүүлж чадсангүй. Төрөлх Бурановодоо сүм барихын тулд “Eurovision”-д оролцсон тэдний үзүүлбэр олон сая үзэгчийг хөгжөөсөн боловч европчууд арай орчин үеийн сонголт хийлээ.