“The Heritage Foundation” олон улсын байгууллагын судалгаагаар эдийн засгийн эрх чөлөөний үзүүлэлтээр Монгол Улс өнгөрсөн онд 58.9 оноогоор 97 дугаарт эрэмбэлэгдэж байсан бол нэг байраар урагшилжээ.

Тодруулбал Монгол Улс энэ онд 59.2 оноо авч, 170 гаруй орноос 96 дугаарт бичигдсэн байна. 10 үзүүлэлтээр эрэмблэснээс Монгол Улс дөрөв буюу хээл хахуульд автахгүй, эрх чөлөө, төсөв захиран зарцуулах талаар эрх чөлөөг нэмэгдүүлсэн нь ерөнхий үзүүлэлт сайжрахад нөлөөлжээ. Түүнчлэн манай улсыг бизнесийн эрх чөлөө буурсан хэмээн дүгнэсэн байна. Тус байгууллагаас Монгол Улсын төсвийн захиран зарцуулах эрх чөлөө нэмэгдэхийн зэрэгцээ төсвийн сахилга бат сулрах эрсдэл байгааг анхааруулжээ. Мөн улс төрийн нөхцөл байдлаас шалтгаалан хууль эрхзүйн орчин тогтворгүй байгааг тусгасан байна. Харин Ази, Номхон далайн бүс нутгийн 42 улсаас 19 дүгээр байрт жагссан нь бүсийн дунджаас дээгүүрт орсныг илтгэж буй аж.