Дэлхийн долоон гайхамшгийн нэг Хятадын Цагаан хэрэм жуулчдын хөлд дарагдаж, амралтын өдрүүдэд бүр ачааллаа дийлэхээ больжээ. Одоогоор Цагаан хэрэмний дөрвөн хэсэгт жуулчдыг хүлээн авч байгаа ч аялал жуулчлалын оргил үед ачаалал нь хэт ихэсдэг тул нэмж хоёр хэсгийг нээхээр болсон байна. Жуулчдын хөл хөдөлгөөнөөс болж Цагаан хэрэмний зарим хэсэг нурж сүйдэж магадгүй гээд ихэнх хэсгийг нь хаасан боловч Хятад руу жуулчдыг татах хамгийн гол үзвэрийн нэг учраас Хуагуачен, Хефанкоу дахь хэсгийг жуулчдад нээхээр шийджээ. Хүний гараар бүтээсэн хамгийн урт байгууламж болох Цагаан хэрэмний талаарх судалгаа үргэлжилсээр хэрэмний уртыг өмнө тогтоосноос хэдэн мянган километрээр илүү болохыг тогтоосон гэнэ. 2009 онд хийсэн судалгаагаар хэрмийг 8850 километр урт гэж тогтоосон бол сүүлийн үеийн мэдээгээр 21 мянган километр ч үргэлжлэхээр байгаа тухай “Синьхуа” агентлаг мэдээлжээ.