Одоогоос 20 гаруй жилийн өмнө Австралид дөнгөж төрөөд удаагүй нялх хүүхэд алга болж, энэ хэрэгт эцэг эхийг нь буруутган олон улс даяар шуугиан дэгдээж байсан. Тэр үед Майкл Чамберлэйний гэр бүл мэндлээд ганцхан сар болж байсан Азариа хэмээх охиноо учир битүүлгээр алдаад зогсохгүй өөрсдөө хэргийн буруутан гэгдэж, эхнэр нь хүн амины хэргээр бүр шоронд хоригдож байсан юм. Гэвч энэ хэргийн жинхэнэ буруутан 22 жилийн дараа тогтоогдож, хүүхдээ алдсан эцэг эх хоёрыг цагаатгажээ.  Тэдний найман долоо хоногтой охиныг ойн зэрлэг нохой динго аваад явсан гэж шүүхээс тогтоосон байна.  Уг нь, хэрэг гарснаас зургаан жилийн дараа хүүхэд алга болсон газрын ойролцоо байх дингогийн үүрнээс нялх хүүхдийн хувцасны тасархай олдсон аж. Гэвч  шүүхээс хэргийн жинхэнэ буруутныг тогтоохгүй байсаар өдийг хүрч, охины эцэг эх шүүхэд давж заалдсаны эцэст нэрээ цэвэрлэж авчээ. Австралийн зэрлэг нохой дингог аюулгүй гэдэг ч энэ явдал тийм биш гэдгийг харууллаа гэж охины эцэг эх мэдэгджээ. Тухайн үед дэлхий даяар шуугиан дэгдээсэн энэ хэргээр Холливудад кино хүртэл хийж, жүжигчин Мерил Стрип гол дүрд нь тоглож байсан билээ.