Хүн амины харгис гэмт хэрэгт сэжиглэгдэж буй Лука Магнотта хэмээх  этгээдийг шүүхээр Германаас Канадад авчирчээ. Тэр бол өнгөрсөн сард Канадыг  цочроосон аймшигт гэмт хэрэгт сэжиглэгдэж буй порно жүжигчин юм.
Өнгөрсөн сарын 29-нд Канадын эрх баригч Консерватив намд нэгэн илгээмж ирсний дотор хүний зэрэмдэглэсэн хөл байж, олон нийтийг цочирдуулсан юм. Гэтэл хэрэг ганц үүгээр дууссангүй, Либерал намд ч бас тэр өдөр шуудангаар хүний гар ирсэн юм. Үүнээс долоо хоногийн дараа Ванкуверийн хоёр ч сургуульд хүний хөл, гар мөн илгээмжээр иржээ. Энэ аймшигт хэргийг цагдаагийнхан шалгаж, хохирогчийг тогтоох гэж оролдож байх хооронд дээрх Лука Магноттагийн гэрийн ойролцоох хогийн савнаас эмэгтэй хүний эх биеийн хэсэг олджээ. Мөрдөн шалгалтын явцад зэрэмдэглэсэн биений хэсгүүд бүгд Жун Лин хэмээх хятад эмэгтэйнх болох нь ДНК-ийн шинжилгээгээр тогтоогдсон юм. Жун Лин нь Лука Магноттагийн дотно харилцаатай байсан эмэгтэй бөгөөд порно жүжигчин найз бүсгүйгээ харгис хэрцгийгээр хөнөөсөн нь үүгээр илэрхий болж. Л.Магнотта хэргийг үйлдсэнийхээ дараа Францад очиж, хэдэн хоног зугаацсаныхаа дараа Германд иржээ. Тэнд байхдаа өөрийн үйлдсэн хүн амины хэргийг нотолсон видео бичлэгийг онлайнаар цацсан байна. Ингээд Канадын цагдаагийнхан Германы талд хүсэлт тавьж, гэмт хэрэгтнийг өөрийнхөө үйлдсэн хэргийн тухай мэдээг сониноос уншиж байхад нь баривчилжээ. 29 настай гэмт хэрэгтнийг баривчлахаар 10 гаруй цагдаа явж, цэргийн онгоцоор авчирсан байна. Түүнийг шүүх хурал өнөөдөр эхлэх юм.