Б.БУЯНДАЛАЙ

Чөлөөт бөхийн насанд хүрэгчдийн Азийн аварга шалгаруулах тэмцээн энэ сарын 18-21-нд Тайландад боллоо. Тус тэмцээнд манай улсаас эх орноо төлөөлөн эрэгтэй, эмэгтэй тус бүр найман жинд 16 тамирчин оролцон хоёр алт, нэг мөнгө, есөн хүрэл медаль авч, багийн дүнгээр эрчүүд аман хүзүүдсэн бол бүсгүйчүүд IV байрт шалгарав. Тодруулбал, эмэгтэйчүүдийн 55 кг-д Д.Отгонцэцэг, 75 кг-д О.Бурмаа нар алт, эрэгтэйчүүдийн 86 кг-д О.Үйтүмэн, мөнгө, 57 кг-д С.Батболд, 61 кг-д Т.Түвшинтулга, 65 кг-д Б.Баярмагнай, 70 кг-д Б.Батзориг, 97 кг-д Д.Хүдэрбулга, 125 кг-д Н.Золбоо, 58 кг-д Э.Гантуяа, 60 кг-д О.Оюунтуяа, 69 кг-д З.Болортунгалаг нар хүрэл медалиар энгэрээ мялаав. Тэмцээний эхний өдөр ДАШТ-ий мөнгө, хошой хүрэл медальт О.Бурмаа аваргалсан талаар манай сонин өмнөх дугаарт мэдээлсэн билээ. ДАШТ-ий мөнгөн медальт Д.Отгонцэцэг эхний тойрогт хийлж, удаах даваануудад БНСУ-ын Ж.Имийг цэвэр, хагас шигшээд Японы М.Кодояг 6:5-аар ялсан. Улмаар финалд Энэтхэгийн Приянкаг ялж түрүүлэв. Харин 86 кг-д О.Үйтүмэн Тайвань, Кыргызстан, БНСУ-ын бөхчүүдийг ялсан ч шигшээд олимп, ДАШТ-ий хүрэл медальт, Азийн хошой аварга Ираны Н.Лашгарид 7:0-оор дийлдэв. Ийнхүү манай бүсгүйчүүд тивийнхээ аваргаас анх удаа хос алтан медаль хүртлээ. Өмнө нь Н.Отгонжаргал 2003, Ц.Энхжарал 2005, 2006, О.Насанбурмаа 2013 онд тус тус Азийн аварга болсон билээ.