Олимпын хүрэл медальт, Ази тивийн анхны аварга, Монгол Улсын гавьяат тамирчин Д.Нармандахын олимпын наадмаас медаль хүртсэний 20 жилийн ой энэ онд тохиож буй. Ойтой холбогдуулан түүний нэрэмжит Жүдо бөхийн өсвөр үеийн олон хотын тэмцээн Эрдэнэт хотын “Хангарьд” спортын ордонд болсон байна. Энэхүү тэмцээнийг 1996 оноос буюу түүний олимпын наадмаас медаль хүртсэн жилээс эхлэн Уулын Баяжуулах “Эрдэнэт” Үйлдвэр тус үйлдвэрийн “Хангарьд” спорт ордон Монголын жүдо бөхийн холбоо хамтран зохион байгуулж ирсэн.

Харин энэ удаагийн тэмцээнийг санаачлагч, ивээн тэтгэгчдийн зүгээс жүдогийн баяр, бахархал, Токио-2020 Зуны олимпын XXXII наадмаас Монголын тамирчид тэр дундаа жүдочид дахин аварга төрүүлэх, анхны эмэгтэй олимпын аваргыг төрүүлэх, олон олон медаль хүртэхийг бэлгэдэн “Бамбар” аялуулах, бадраах ёслолын ажиллагааг зохион байгуулсан байна. Тэмцээнийг өсвөр үеийн улсын аварга шалгаруулах тэмцээний жингийн ангилалаар явуулсан бөгөөд хот, хөдөөгийн 40 гаруй байгууллагын 800-гаад тамирчин оролцжээ. Шилдэг эрэгтэй тамирчнаар Баянзүрх дүүргийн спорт хороо, “Женко” клубийн тамирчин О.Жавхлантөгс, шилдэг эмэгтэй тамирчнаар Д.Сувд-Эрдэнэ, Шилдэг цэвэр ялалт, хамгийн олон цэвэр ялалт байгуулсан тамирчнаар О. Цэцэнцэнгэл нар шалгарчээ.