Б.СЭВЖИДМАА

АНУ дүрвэгсдээс нүүр буруулсан энэ үед Канад улс шашин шүтлэгээс нь үл хамааран дайн тулаан, алан хядлагын аюулаас зугтаж яваа хүн бүрийг угтан авах болно гэж Ерөнхий сайд нь мэдэгдлээ. Өнгөрсөн 13 сарын хугацаанд 40 мянган дүрвэгчийг хүлээн авснаараа дэлхийн анхаарлыг татсан Канадын Ерөнхий сайд Жастин Трюдо Твиттерээр дамжуулан энэ урилгаа илгээсэн юм. Сирийн дүрвэгсдийн эхний цувааг нисэх буудал дээр өөрийн биеэр тосч байсан Жастин Трюдогийн Засгийн газар энэ жил 300 мянган цагаач хүлээн авах төлөвлөгөөтэй байна.

Д.Трампын хоригоос үүдэн хилээр ямар хүмүүсийг нэвтрүүлэх тухайд эргэлзээтэй байдал үүссэн тул Канадын тал АНУ-ын Дотоодын аюулгүй байдлынханд хандаж, тодруулга хүсчээ. Тухайлбал, дээрх хоригт багтсан долоон улсын аль нэгнийх нь иргэн Канадын давхар иргэншилтэй бол АНУ-д нэвтэрч болох эсэхийг лавласан байна. АНУ-ын албаныхны өгсөн тайлбараар Канадын давхар иргэншилтэй, канадын паспортоор зорчиж буй иргэд хоёр улсын хооронд чөлөөтэй зорчих ажээ.
Жастин Трюдогийн мэдэгдлийн дараа Канадын Квебек хот дахь Исламын соёлын төвд халдлага гарч, таван хүн амиа алдлаа. Соёлын төвд 40 орчим эрэгтэй мөргөл үйлдэж байхад гэмт этгээдүүд гал нээж эхэлсэн аж. Халдлагыг үйлдсэн байж болзошгүй хоёр сэжигтнийг баривчилсан бөгөөд Ерөнхийлөгч Доналд Трампын хоригоос үүдэлтэй байж болзошгүй гэж албаныхан үзэж байна.