Өнөөдөр Спортын төв ордонд “Допинг ба өнөөгийн байдал”, “Допингийн эм зүйн ангиллын хориглосон жагсаалт” сэдвээр багш, тамирчдад зориулсан сургалт болов.
БТСГ-ын Спортын анагаах ухаан, эрдэм шинжилгээний алба/САУЭША/-наас Үндэсний шигшээ багийн тамирчин, дасгалжуулагч нарт цуврал сургалт зохион байгуулж байгаа юм. Эхний сургалт “Биеийн тамир, спортын салбарын ёс зүй ба тамирчин, дасгалжуулагчийн ёс зүй нийгмийн хөгжилд нөлөөлөх нь” сэдвээр болсон бол хоёр дахь сургалт дээр дурдсан сэдвийн хүрээнд болж байна.
Сургалтыг САУЭША-ны дарга Ч.Насанбат удирдсан юм. Тэрбээр, Дэлхийн допингийн эсрэг агентлагаас жил бүр шинэчлэн гаргадаг хориотой эм зүйн ангиллын шинэчлэн батлагдсан жагсаалтыг танилцууллаа. Дэлхийн допингийн эсрэг агентлаг допингийн эсрэг үйл ажиллагаагаа улам идэвхжүүлж, хориотой эм зүйн ангиллын төрлүүдээ нэмэгдүүлж, допинг хэрэглэсэн тамирчны хүлээх хариуцлагыг чангатгасан талаар мэдээлэл өгөв.
Тухайлбал, өмнө нь тухайн тамирчнаас допингийн хориглосон бодис илэрвэл хэрэглэсэн эмийн шинж чанараас шалтгаалж тэмцээн уралдаанд оролцох эрхийг нь гурван сараас хоёр жил хүртэлх хугацаагаар хасдаг байсан. Харин энэ жилээс хориотой эмийн бэлдмэл хэрэглэсэн тамирчныг хамгийн багадаа дөрвөн жилээр тэмцээн уралдаанд оролцох эрхийг нь хасах, давтан хэрэглэвэл бүх насаар нь хасахаар шийдвэрлэжээ.
