Энэтхэг улсын Дели хотод тавдугаар сарын 10-14-нд болох насанд хүрэгчдийн Азийн аварга шалгаруулах тэмцээнд Монгол Улсын баг тамирчдыг оролцуулах шийдвэр гаргаснаа Дэлхийн Бөхийн нэгдсэн холбооноос албан ёсоор мэдэгджээ.

Чөлөөт бөхийн холбоо энэ тэмцээнд оролцох тамирчдынхаа мэдүүлгийг хоцруулснаас болоод Дэлхийн бөхийн нэгдсэн холбоо манай тамирчдыг Азийн болон Дэлхийн аварга шалгаруулах тэмцээнд оролцуулахгүй гэж мэдэгдээд байсан юм. 

Үүнтэй холбогдуулан  Монголын чөлөөт бөхийн холбоо мэдэгдэл гаргасан байна. Үүндээ “Монголын чөлөөт бөхийн холбооны удирдлага, Удирдах зөвлөл энэ асуудал дээр шуурхай ажилласан. Шаардлагатай бүх арга хэмжээг цаг алдалгүй авсан бөгөөд дэмжлэг үзүүлэн хамтарч ажилласан БСШУСЯ, Биеийн тамир, спортын бодлогын газар, Засгийн газрын хэрэгжүүлэгч агентлаг БТСГ-ын удирдлага, хэлтэс, албад, хамт олонд талархал илэрхийлье. Монголын чөлөөт бөхийн хамт олон, бөхөд хайртай дэмжигч ард түмэн энэхүү хүнд байдлыг хамтдаа даван туулж чадлаа. Та бүхэнд баярласан талархсанаа илэрхийлэхийн ялдамд цаашид ийм зүйл давтагдахгүй гэдгийг илэрхийлж байна” хэмээн бичжээ.