60 хоногийн дараа наймдугаар сарын 19-нд Тайваны Тайпей хотноо эхлэх Дэлхийн оюутны спортын XXIX дүгээр "Универсиад" наадмын галт бамбар асаах ёслол Италийн Турин хотод болсон байна.

1959 онд анхны "Универсиад" наадам болж байсан тул  галт бамбарыг уламжлал ёсоор Турин хотоос эхлүүлж, галт бамбарыг асаах ёслолд Олон улсын оюутны спортын холбооны ерөнхийлөгч О.Матыцин, "Универсиад-2017" наадмын зохион байгуулах хорооны дарга, Тайпей хотын дарга Ко Вен Же, Турин хотын их сургуулийн ректор Г.Ажани, Тайванийн тамирчин, олимпын аварга Чу Му Ен нар оролцжээ.

Энэ удаагийн наадамд 170 гаруй орны 12,500 тамирчин, төлөөлөгчид оролцож, спортын 19 төрөлд 300 орчим багц медалийн төлөө өрсөлдөнө. Харин манай улсаас есөн төрөлд тамирчдаа сойж буй. Тодруулбал, жүдо, таэквондо, хүндийн өргөлт, хөнгөн атлетик, усанд сэлэлт, теннис, ширээний теннис, сагсан бөмбөг, гольф гэсэн төрөлд 100 орчим хүний бүрэлдэхүүнтэй оролцох юм.