Монгол Улсын Ерөнхийлөгчийн ивээл дор жил бүр уламжлал болгон зохион байгуулдаг 21 аймгийн хөлбөмбөгийн аварга шалгаруулах "Үндэсний цом" тэмцээнийг ирэх сарын 16-24-нд Орхон аймагт зохиохоор болжээ.

"Үндэсний цом" тэмцээнийг хүлээх авах боломжтой, өөрийн гэсэн талбайтай хэд хэдэн аймгаас "Хүрхрээ үндэсний лиг"-ийн тоглолтуудыг зохион байгуулдаг Орхон аймаг нутагтаа зохиох эрхийг авсан нь энэ юм байна. "Үндэсний цом" тэмцээн өнгөрсөн жил анх удаа хөдөө орон нутагт тэр дундаа Сүхбаатар аймгийн Баруун урт хотноо бүтэн явагдсан бол энэ удаад Эрдэнэт хотод, 21 аймгийн аваргыг шалгаруулах нь.

Тэмцээнд "Хүрхрээ үндэсний лиг"-ийн тоглогч оролцох боломжгүй бөгөөд бусад тэмцээнд оролцдог тоглогчид клубийнхээ зөвшөөрлөөр, аймгийнхаа харъяаллыг шалгуулж, нутаг орныхоо шигшээ багт хүчин зүтгэх боломжтойг МХБХ-ны Тэмцээн зохион байгуулах комисоос мэдэгдлээ.