Ерөнхийлөгч Башар Асадыг огцрохыг шаардсан эсэргүүцлийн хөдөлгөөн өрнөж,  иргэний дайн болж байгаа Сири улсаас нийтдээ 115 мянган хүн дүрвэж гадаад оронд гарчээ. Өчигдөр Киприйн нийслэлд болсон Европын холбооны гишүүн орнуудын гадаад хэргийн сайд нарын албан бус уулзалтын үеэр НҮБ-ын дүрвэгсдийн асуудал хариуцсан Дээд комиссарын газар мэдээлсэн байна. Дүрвэгсдийн олонхи нь Турк, Иордан, Ливан руу гарсан бол харин Ирак руу арай цөөн нь гарсан байна.  Киприйн Гадаад хэргийн сайд Элен Мавругийн хэлснээр бол дүрвэгсдийн тал нь хүүхэд байгаа юм байна.  Киприйн Гадаад хэргийн сайд бас Сириэс лавтай 200 мянган хүн дүрвэх магадлал байна, тэгэхээр Европын холбоо болон бусад улс орнууд тэдний амьдрах нөхцөлийг хангах арга хэмжээ авах шаардлагатай гэжээ. Сирийн дүрвэгсдэд зориулан Ирак, Иордан улс хилээ нээхээ өчигдөр зарлаад байна.