Сирийн эрх баригчид химийн зэвсгээ хил орчмын  нисэх буудлууд руу зөөж байна гэж тус улсын сөрөг хүчний төлөөлөгч өнөөдөр мэдэгдсэн байна. Даваа гарагт нийслэл Дамаскийн эргэн тойронд, ойр орчмын хотуудад ширүүн тулалдаан болж байхад Сирийн засгийн газрын гадаад бодлогын тэргүүн “Бид босогчдын эсрэг хэзээ ч химийн зэвсэг хэрэглэхгүй, харин гадаадын цэрэг орж ирсэн тохиолдолд хэрэглэж болох юм” гэж хэлсэн юм. Вашингтон энэ аюулаас болгоомжилж байна. “Бид Асадын дэглэмээс ангижирахад нь Сирийн ард түмнийг дэмжих ёстой. Химийн зэвсэг эзэмшиж байгаа  Башар Асад, түүний тойрон хүрээлэгчид химийн зэвсэг хэрэглэж эмгэнэлт алдаа хийх юм бол АНУ, олон улсын хамтын нийгэмлэг хариуг нь барих  хэрэгтэй болно” гэж АНУ-ын ерөнхийлөгч Барак Обама хэлсэн байна.