Монголын үндэсний бөхийн холбооны ерөнхийлөгч асан Р.Нямдорж болон Д.Данзан, Улсын заан Д.Мягмар нар өнөөдөр сэтгүүлчдэд хандав. Тэд тус холбоог үүсгэн байгуулж байсан тухайгаа болон одоо үүсээд байгаа нөхцөл байдлын талаар сэтгүүлчдэд мэдээлэл өгсөн юм.
Энэ үеэр Р.Нямдорж “Би энэ холбоог 28 жил тэргүүлэн ажиллалаа. Энэ хугацаанд 60 шинэ ажлыг бид санаачилж хийсэн байдаг юм. Та бүхэн мэдэж байгаа байгаа ч гэлээ дахин сануулж хэлье гэж бодож байна. Тухайлбал, допингийн шинжилгээг наадмаар хийдэг байсныг, наадмаас наадмын хооронд хийдэг болгосон. Бөхчүүдийг цахимаар бүртгэж барилдуулдаг болсон гээд цааш дурдвал олон ажил бий. Гэвч сүүлийн үед Баянмөнх аварга тэргүүтэй бөхчүүд холбооны нэр хүндэд халдаж, зохион байгуулалтайгаар мэдээ мэдээлэл цацаж байна. Үүнээс нь болж иргэдэд буруу ойлголт бий болжээ. Бөхийн өргөө хэний өмч вэ гэдэг нь тодорхойгүй байна гэх зэргээр мэдээлэл цацагдаж байна. Монгол бөхийн өргөө бол МҮБХ-ны өмч шүү дээ.
2010 онд хуралдсан зургадугаар “Их эе”-ээр баталсан дүрэмд энэ талаар тусгаж өгсөн байдаг юм. Түүгээр ч зогсохгүй Монгол бөхийн өргөөг ямар нэгэн зээлийн барьцаанд тавих, мөн өмчлөхийг хориглосон. МҮБХ 1990 онд улсын бүртгэлд бүртгүүлчихсэн гэрчилгээ нь хүчин төгөлдөр байхад Чинбат нар Улсын бүртгэлийн газраас МҮБХ-ны гэрчилгээг авснаас гадна гэрчилгээндээ үндэслээд тамга авсан байдаг юм. Энэ мэтээр булхайтай мэдээлэл олон бий.
Одоо бол Данзан бид хоёр цаашид Монголын үндэсний бөхийн холбоонд ажиллахгүй. Гэхдээ бөхөөсөө холдохгүй. Бөхийн хөгжлийн төлөөх ажлаа хийсээр байх болно.