Хөгжлийн бэрхшээлтэй хүүхдүүдэд паралимпийн хөдөлгөөнийг таниулан, сурталчлах, паралимпийн спортод татан оролцуулах, залуу тамирчдын авъяасыг нээн илрүүлэх, амьдралын зөв дадал хэвшилтэй иргэн болгон төлөвшүүлэхэд энэхүү наадмын зорилго оршино.
Монгол Хятад хоёр орны биеийн тамир, спорт, хүмүүнлэгийн үйл ажиллагааг цаашид улам эрчимтэй хөгжүүлэх зорилгоор Монгол Улсын Хөгжлийн бэрхшээлтэй хүүхдийн “Гранд Чайна Спортс” наадмыг 2018, 2019, 2020 онуудад Монголын Үндэсний Паралимпийн хороо, Гранд Чайна Компани (Тиан Жин) ХХК, Монгол-Хятадын биеийн тамир, спортын холбоо, Монголын Тусгай Олимпийн Хороо, Монголын Дифспортын Хороо, Пара спортын холбоод, Хөгжлийн бэрхшээлтэй иргэдийн спортын холбоодтой хамтран зохион байгуулна.
Энэ удаагийн хөгжлийн бэрхшээлтэй хүүхдийн спортын наадам нь Улаанбаатар хотноо 2018 оны 05 дугаар сарын 29-31-ний өдрүүдэд спортын 8 төрлөөр зохион байгуулагдах бөгөөд нийт 500 гаруй өсвөрийн тамирчид, 90 гаруй шүүгчид болон 60 хүний бүрэлдэхүүнтэй зохион байгуулах хороо, сайн дурын ажилтан хамрагдах юм.
Монгол улсад анх удаа зохион байгуулж байгаа хөгжлийн бэрхшээлтэй хүүхдийн спортын наадмын хөтөлбөрт паралимп, дифлимпийн болон тусгай олимпийн наадмын хөтөлбөрт багтдаг спортын төрлүүдийг оруулсан нь хөгжлийн бэрхшээлтэй олон хүүхдүүдийг хамруулах боломжийг нээж өгсөн юм.