“Будапешт-2018” насанд хүрэгчдийн ДАШТ-ий эхний өдөр эрэгтэйчүүдийн 86 кг-ын жинд “Жакарта-2018” Азийн наадмын хүрэл, Азийн АШТ-ий хошой мөнгө, нэг хүрэл медальт, “Алдар” спорт хорооны тамирчин ОУХМ О.Үйтүмэн Монголын тамирчдын салхийг амжилттай хагаллаа. Тэрбээр эхний барилдаанаа БНХАУ-ын Зушен Линтэй хийж оноогоор цэвэр (10:0) яллаа. Ингэснээр О.Үйтүмэн 1/8 шигшээд Пан-Америкийн хошой аварга Кубын Юриески Торребланкатай хүч үзнэ. Түүний жинд АНУ-ын Давид Тайлор эхний даваанд олимп, дэлхийн аварга Ираны Хассан Язданиг 11:6-гаар яллаа.