Билгийн тооллын 17 дугаар жарны урвуулагч хэмээх шороон гахай жилийн сар шинийн баярт зориулсан сумын цолтой болон залуу бөхчүүдийн барилдааныг Монголын үндэсний бөхийн холбоо, Хавдарын эсрэг үндэсний зөвлөлтэй хамтран өчигдөр /02.01/ Монгол бөхийн өргөөнд зохион байгууллаа.

Барилдаанд 320 бөх уран мэх, авхаалж самбаа сорин барилдсанаас Өвөрхангай аймгийн Төгрөг сумын харьяат, Их монголын хүчтэн дэвжээний бөх, сумын заан Ц.Бямба-Отгон ес даван түрүүлж, Ховд аймгийн Манхан сумын харьяат, Ховд дэвжээний бөх, сумын заан Б.Даваадалай найм даван үзүүрлэжээ. Их шөвөгт Баянхонгор аймгийн Жаргалант сумын харьяат, сумын баяр наадамд 5 удаа түрүүлсэн манлай заануудын нэг Э.Совджамц шалгарсан байна.

Уран барилдааны шагналыг Архангай аймгийн Батцэнгэл сумын харьяат, сумын заан Түмэндэмбэрэлд гардуулжээ. 

Өнөөдөр /2019.02.02/ Дашчойлин хийдийн нэрэмжит Аймаг, цэргийн цолтой болон залуу 256 бөхийн барилдаан "Монгол бөхийн өргөө"-нд 14.00 цагаас болно.

Түүнчлэн Улс, аймгийн алдар цолтой 256 бөхийн барилдаанд барилдах бөхчүүдийн бүртгэл өнөөдөр эхэлж байгаа бөгөөд хоёрдугаар сарын 2, 3-ны өдрүүдэд 10-18 цагийн хооронд "Монгол бөхийн өргөө"-нд бүртгэнэ. Бөхчүүд цолны үнэмлэхтэйгээ, өөрийн биеэр ирж бүртгүүлэх аж.