Маргаантай Сэнкаку арал дээр японы талынхны барьцаалаад байгаа хятадын 14 иргэнийг ямар ч яриа хэлэлцээргүйгээр яаралтай суллахыг Хятад улс Японоос шаардлаа. Уг арлыг хятадууд Дяоюйдао гэж нэрлэдэг байна. Лхагва гарагийн өглөөгүүр Гонконгоос гарч явсан загасчны завьтай хүмүүсийг японы эргийн хамгаалалтын албаныхан саатуулсан юм.
БНХАУ-ын Гадаад хэргийн дэд сайд Фу Ин энэ үйл явдлыг “Дяоюйдао арал дээр хятадын иргэдийг хууль бусаар саатуулсан” гээд “Японы тал хятадын загасчдын аюулгүй байдлыг хангахын зэрэгцээ ямар ч нөхцөлгүйгээр түргэн суллах ёстой” гэж тэмдэглэсэн байна.
Хариуд нь Японы тал “Хятадууд японы газар нутагт хууль бусаар нэвтэрсэн” гээд загасчдыг ойрын үед Гонконг руу буцаана гэжээ.
Дорнод Хятадын тэнгист Тайваны арлаас зүүн хойд зүгт 170 км-т байх энэ таван арлынэ өрөв нь ийнхүү Япон Хятад хоёрын маргаантай бүсэд оршдог юм. Япон болохоор 1895 оноос манай мэдэлд байсан гэдэг бол Бээжин 1783, 1785 оны газрын зураг дээр хятадын нутагт орсон байдаг гэж маргалддаг байна. Дэлхийн хоёрдугаар дайны дараа энэ арал АНУ-ын мэдэлд байснаа 1972 онд Японы мэдэлд буцааж өгчээ. Хятад болохоор япон энэ арлыг хууль бусаар эзэмшиж байна гэдэг бол Япончууд харин ашигт малтмал ихтэй болохоор хятадууд эзэмших гэж байна гэж буруутгадаг  байна.

Х.Өлзий