UCMAS олон улсын соробан сампин, цээж тооллын тэмцээнд Тояа хүүхэд хөгжлийн академийн сурагчид оролцож 38 чемпион, 36 алтан цом, 6 мөнгөн цом хүртсэн гайхалтай амжилт үзүүлсэн билээ.
24 дэх удаагийн UCMAS олон улсын тэмцээн Камбож улсын нийслэл Пномпень хотод 12 дугаар сарын 7,8-ны өдрүүдэд зохион байгуулагдаж дэлхийн 40 орны 4000 орчим хүүхэд багачууд 10 ангилалд оюуны чадвараараа өрсөлдсөн юм.
Энэхүү тэмцээн жил бүр зохион байгуулагддаг бөгөөд UCMAS боловсролын байгууллагын гишүүн буюу дэлхийн 79 орны сурагчид оролцдог юм. Арабын Нэгдсэн Эмират улсад 2016 онд зохион байгуулагдсан олон улсын тэмцээнд хамгийн их оролцогч буюу 6000 гаруй хүүхэд дэлхийн олон орноос хүрэлцэн ирж оролцож байжээ.
Энэ удаагийн тэмцээнд 40 орны 4000 гаруй сурагчид хоёр өдрийн турш оюун ухаанаар өрсөлдсөн юм.
Монгол хүүхдүүд 2012 онд анхны олон улсын тэмцээндээ оролцож, 2 хүрэл цом хүртсэн амжилт үзүүлж байсан байдаг. Харин 2019 оны Камбож улсад зохион байгуулагдсан тэмцээнд 38 чемпион буюу аварга цолтон төрлөө.
Тояа академиас соробан сампингийн Үндэсний аварга шалгаруулах тэмцээнийг 2019 оны 5-р сард Улаанбаатар хотод зохион байгуулсөн бөгөөд нийт оролцсон 2500 сурагчдаас шагналт байранд шалгарсан хүүхдүүд олон улсын тэмцээнд орох эрхээ авдаг юм. Эрх авсан сурагчид Тояа хүүхэд хөгжлийн академид 7 сарын турш бэлтгэлээ хангадаг байна.
Камбож улсад зохион байгуулагдсан тэмцээнд амжилттай оролцсон оюунлаг тамирчид маань өнөөдөр 15:50 цагт Чингис хаан нисэх онгоцны буудал дээр хүрэлцэн ирнэ.
