2014 оноос хойш НҮБ нь "Олон Улсын Олимпийн Хороо"-той хамтран жил бүрийн 4 сарын 6-ны өдрийг "Олон улсын энх тайван, хөгжлийн төлөөх спортын өдөр" болгон тэмдэглэж байхаар болсон юм.
Уг өдрийн хүрээнд спортоор дамжуулан энх тайвныг бэхжүүлэх, хөгжлийн алхмуудыг эхлүүлэх зэрэг санаачлагыг эргэн санах зорилготой. Цаашлаад спорт дахь тэгш байдал, тэгш оролцоо, спортын хөгжлийн арга замууд, бүх нийтийн оролцоо зэрэг олон талын ойлголтыг олон нийтэд сануулах, үйл хөдлөлд уриалдаг учиртай.
2001 онд тухайн НҮБ-ийн ерөнхий нарийн бичгийн дарга Кофи Аннаны санаачлагаар "НҮБ дахь энх тайван, хөгжлийн төлөөх спортын алба"-ыг бий болгосон бөгөөд түүнээс хойш НҮБ нь спортоор дамжуулан дэлхийд энх тайвныг бэхжүүлэх, хөгжлийн алхмуудыг хийх цогц хөтөлбөрүүдийг хэрэгжүүлсээр ирсэн байна.
