Улсын онцгой комиссын 18 дугаар хуралдаанаар 04 дүгээр сарын 30-нд БНСУ руу, 05 дугаар сарын 02-нд ХБНГУ-ын Франкфурт хот руу тусгай нислэг үйлдэхээр шийдвэрлэсэн. Тэгвэл энэхүү шийдвэрт өөрчлөлт оржээ. Тодруулбал, УОК-ын Шуурхай штабаас саяхан мэдээлэл хийж дууслаа. Тус хурлаар УОК-ын Шуурхай штабын дарга Б.Ууганбаяр “Энэ сарын 30-ны нислэгт зөвхөн Сөүлээр дамжиж ирж байгаа буюу транзит зорчигчдыг авчрахаар боллоо. Харин тавдугаар сарын 1-ний нислэгээр Сөүлд байгаа иргэдээ авчирна. ХБНГУ-ын Франкфурт хот руу тавдугаар сарын 2-ны өдөр нислэг хийж, Европт байгаа иргэдээ авч ирнэ" гэдэг мэдээллээ өглөө.
Энэ удаагийн тусгай үүргийн нислэгүүдээр ирэх иргэдийг шинээр бүртгэхгүй бөгөөд Монгол Улсаас гадаад улсад суугаа Элчин сайдын яамдаар дамжуулан Улсын онцгой комисст өнөөдрийг хүртэл ирүүлсэн нутаг буцах тухай 9000 гаруй өргөдөл, хүсэлтээс хүндэтгэн үзэх шалтгаантай иргэдийн өргөдөл, холбогдох нотлох материалыг хариуцаж буй ЭСЯ-даар дамжуулан хүлээн авч УОК-ын Шуурхай штаб шийдвэрлэхээр болсон юм.
