МАН сонгуульд оролцох хүсэлтээ СЕХ-нд хүргүүллээ. Энэ үеэр Ерөнхий сайд, МАН-ын дарга У.Хүрэлсүх сэтгүүлчдийн асуултад хариулсан юм. Тэрбээр “Энэ удаагийн сонгууль хүндхэн нөхцөлд явагдах гэж байна. Энэ хүнд цаг үед БНСУ сонгуулиа амжилттай явуулж, иргэд нь 26 жил байгаагүй өндөр ирцтэйгээр сонгуульд оролцсон. Үүнтэй адилхан манай иргэд дөрвөн жилд нэг болдог сонгуульдаа идэвхитэй оролцоно гэдэгт Ерөнхий сайдын хувьд, ууган намын даргын хувьд итгэж байна.

Энэ удаагийн сонгууль шударга яваасай гэж хүсч байгаа. МАН бүх зүйлийг хуулийн хүрээнд хийнэ гэдгээ албан ёсоор мэдэгдэж байна. Бүх зүйлээ хуулийн хүрээнд хийнэ гэдгээ мэдэгдэхийг хүсч байна. МАН-ын мөрийн хөтөлбөрт хууль зөрчсөн нэг ч зүйл байхгүй гэдгийг хэлье. Өмнө нь хийж хэрэгжүүлсэн ажлуудыг бүрэн төгс хийж гүйцэтгэж дуусгах ёстой юм. Хүн рүү чиглэсэн олон асуудал байгаа. Мөрийн хөтөлбөр хуулийн хүрээнд ном дүрмийн дагуу хийгээд, хянагдсан.

МАН социал демократ нам. Тиймээс тэр үзэлдээ суурилан нийгмийн баримжаатай зах зээлийг хөгжүүлэх үзэл баримтлалтай, философитой мөрийн хөтөлбөр болсон.

Зарим намууд орон сууц амлаж байгаа нь хэзээ ч биелэгдэшгүй зүйл. Улсын авдарт хэдэн төгрөг, нөөц байгааг надаас илүү мэдэх хүн байхгүй байх. Тэр амлалтуудаа засаж залруулах байх. Улс төрийн намууд хэзээ ч биелэгдэхгүй амлалт өгч болохгүй. Ард түмэн ч итгэж болохгүй. Ард иргэд та бүхэн мөрийн хөтөлбөрүүдийг маш сайн уншаарай.

Намын даргаар сонгогдсоноосоо хойш намаа цэвэрлэнэ, төр засгаа цэвэрлэнэ гэж ярьж ирсэн. Энэ бодсон бодлого, зорилт хэрэгжиж байгаа. Цаашдаа ч бүрэн төгс хэрэгжүүлэхийн төлөө явна. Би Монгол Улсын парламентад хулгайч хүмүүс битгий суугаасай гэж бодож байгаа. Парламент бол манай ард түмний төлөөлөл болсон газар. Сор болсон сэхээтнүүд суугаасай гэж бодож байна.

Бүх салбарын төлөөлөл байгаасай гэж бас дотроо боддог. Ийм байж парламентад зөв бодлого гардаг. Залуу, дунд, ахмад үеийн төлөөлөл байх ёстой. Намын даргын хувьд өөрийнхөө багийг авч сонгуульд орно гэдгээ хэлье.

МАН дэнчин болгож аль нэг нэр дэвшигчээс мөнгө авахгүй. Хууль зөрчиж байгаа юм. Энэ бол мөнгөтэй хүн нэр дэвшиж, мөнгөгүй хүн дэвшиж болохгүй гэсэн утгатай. Мэдээж сонгуульд тодорхой хэмжээний мөнгө шаардлагатай. Нэр дэвшигчид тодроод хандив цуглуулах хуулийн хугацаандаа цугласан хандиваар сонгуулиа зохион байгуулах бүрэн бололцоо улс төрийн намуудад байгаа.

Мөнгөний сонгуулиа болъё. Алдаа дутагдал байсан уу байсан. Одоо үүнийгээ засч залруулъя. Хандиваа  юунд зарсан тайлангаа эргээд тайлагнах ёстой. Сонгуулийн мөнгө төгрөгийг хуулийн хүрээнд цуглуулж, хуулийн хүрээнд зарцуулж, эцэстээ ард түмэндээ тайлагнах ёстой” гэлээ.