Нийслэлийн прокурорын газрын хяналтын прокурор Д.Эрдэнэсувд олны анхаарлын төвд байгаа зарим хэргийн талаар мэдээлэл өглөө. Тодруулбал, М.Энхсайханд авсан хувийн баталгаа гаргуулах таслан сэргийлэх арга хэмжээг өөрчилж, түүнийг дараагийн шүүх хуралдаан хүртэл цагдан хорих таслан сэргийлэх арга хэмжээ авсан болоод эрүүдэн шүүсэн гэх мэдээлэлд тайлбар өглөө.
Тэрбээр “Яллагдагч хүн тодорхой үүргийг хүлээсэн байдаг. Яллагдагчийн хувьд мөрдөн байцаах ажиллагаа дууссаны дараа хавтаст хэрэгтэй танилцаж эрхээ эдлээд, нотлох баримтуудыг хуулбарлан авсан байдаг. Түүний гэм буруугүй асуудлыг нь шүүхээр эцэслэн шийдвэрлээгүй байхад тухайн нотлох баримтыг болон гэрчүүдийн мэдүүлэг, тодорхой шийдвэрүүдийг хэвлэл мэдээллийн хэрэгслээр тараасан. Энэ нь мөрдөн байцаах ажиллагааг задруулахгүй гэж баталгаа авч гарын үсэг зурсан хүний хувьд хариуцлагагүй үйлдэл юм. Тиймээс шүүхээс цагдан хорьсон. Прокурорын зүгээс шүүх хуралдааны явцад мөрдөн байцаалтын ажиллагааны нууцыг задруулсан, шүүхэд нөлөөлөх гэсэн байдалд нь хуульзүйн дүгнэлт хий гэсэн асуудлыг хөндөж тавьсан. Энэ асуудалд шүүхээс дүгнэлт хийгээд цагдан хорих, таслан сэргийлэх арга хэмжээ авсан байгаа.
Цагдан хорих явцдаа эрүүдэн шүүсэн гэдэг мэдээлэл нь ташаа гэж хэлж болно. Нийслэлийн прокурорын газраас хорих 461 дүгээр ангид хоригдож байгаа яллагдагч нартай тогтмол уулзаж, санал хүсэлтийг нь сонсдог. Дөрөвдүгээр сарын 24-нд буюу өнгөрсөн баасан гарагт прокуророос М.Энхсайхантай уулзсан. Уулзалтын үеэр түүний зүгээс ямар нэгэн санал хүсэлт хэлээгүй бөгөөд хоолоо сайн идэж байгаа гэсэн хариулт өгсөн” гэлээ.
