Иргэдээ гадаадаас татан авах ажлыг үргэлжлүүлэн зохион байгулахаар болсон билээ. БНСУ-руу хоёр, ХБНГУ-руу нэг нислэгийг тус тус хийнэ. БНСУ-руу хийх хоёр удаагийн нислэгийн нэгийг зөвхөн Солонгос Улсад байсан иргэдээр, нөгөөг транзит нислэгээр Сөүлээр дамжин Монгол Улсдаа ирж буй иргэдээр дүүргэж ялган тээвэрлэх юм.
Тусгай зориулалтын нислэгт суух иргэдэд ковид-19-ийн халдварын шинжилгээ хийлгэсэн байх шаардлагыг УОК-оос тавьж буй. Энэ дагуу Солонгос дахь Монгол иргэдэд Солонгосын тал шинжилгээ хийж өгч байгаа бол транзит нислэгээр Сөүлд ирсэн Монгол иргэд шинжилгээнд хамрагдаж чадаагүй байх нөхцөл байгаа учир ийнхүү хоёр тусдаа нислэг зохион байгуулахаар болсон.
Тэгвэл дээрх нислэгүүдээр хэдэн хүн эх орондоо ирэх гэж буй талаар өнөөдөр Гадаад харилцааны яамны Консулын газрын дарга Л.Мөнхтүшиг мэдээлэл өгсөн. Тэрбээр 86 настай хорт хавдартай иргэнийг авчрахаар болсныг мэдээлэл хийх үеэрээ дурдсан. Түүний өгсөн тоон мэдээллийг хүргэе.
4 дүгээр сарын 30 СӨҮЛ-УЛААНБААТАР /ТРАНЗИТ/
Нийт 7 улсаас 273 зорчигч ирнэ.
Тавдугаар сарын 1 СӨҮЛ-УЛААНБААТАР
Нийт 271 зорчигч ирнэ
Тавдугаар сарын 2 ФРАНКФУРТ- УЛААНБААТАР
Нийт 13 улсаас 263 зорчигч ирнэ
Ийнхүү гурван удаагийн нислэгээр нийт 807 иргэнээ татаж авахаар болсон байна. Хүндэтгэн үзэх шалтгаанаар нь ангилан, нотлох баримтаар баталгаажуулж хүмүүсээ сонгосон гэсэн юм.
