УОК-ын Шуурхай штаб өнөөдөр мэдээлэл хийсэн билээ. Энэхүү мэдээллийн үеэр МИАТ ТӨХК-ийн гүйцэтгэх захирал Д.Баттөр тасалбарын үнэ өндөр байна гэсэн иргэдээс ирүүлсэн гомдол, саналд тайлбар өглөө. Тэрбээр "Улаанбаатар-Франкфурт чиглэл зургаадугаар сарын сүүлээр эхэлдэг байгаа. УОК-ын хүсэлт, шийдвэрийн дагуу бид Берлиний чиглэлээ Франкфурт болгон өөрчилж нислэг үйлдэхээр болсон. Энэ нислэгээр ирэх хүмүүсийн 50 гаруй хувь нь манай өөрийн үйлчлүүлэгчид. Өөрөөр хэлбэл, Берлиний чиглэлд тасалбараа авчихсан байсан хүмүүс.
Харин үлдсэн 30-40 хувь нь шинээр тасалбар авсан хүмүүс байгаа юм. Тасалбарын үнэ ойролцоогоор 725 евро байдаг. Энэ нь 2015 онд батлагдсан тариф. 5 жилийн өмнөөс мөрдөгдөж эхэлсэн гэсэн үг. Энгийн ангилалд 10 гаруй төрлийн тариф байдаг бөгөөд 400-900 еврогийн хооронд хэлбэлздэг. Тэгэхээр 725 евро гэдэг нь дунджаас арай дээгүүр үнэтэй юм. Эрэлт их байгааг хүмүүс мэднэ. Гэхдээ хүмүүс нэг зүйлийг ойлгох хэрэгтэй. Энэхүү нислэг зөвхөн нэг талдаа үйлдэгдэх учир өмнө нь батлагдсан хуучин тарифаараа үйлчлэх нь зүйтэй юм байна гэж бид үзсэн” гэсэн юм.
Дашрамд сонирхуулахад, тавдугаар сарын 2-нд ФРАНКФУРТ- УЛААНБААТАР чиглэлийн нислэгээр нийт 13 улсаас 263 зорчигч ирнэ.
