Перугийн цагдаагийнхан  хууль бусаар хил давуулах гэж байсан 16 мянган ширхэг хатаасан далайн морийг хураан авчээ. Эрүүл мэндэд нэн ашиг тустай гэгддэг энэ амьтныг барих нь хууль бус боловч Азийн орнуудад өндөр үнээр худалдаалдаг учир энэ төрлийн хэргийг зогсоож чаддаггүй байна. Өнгөрсөн онд дэлхий даяар 20 тонн хатаасан далайн морийг хууль бусаар хил давуулах гэж байсныг хууль хяналтынхан хураан авсан тоо байдаг.
 Далайн морийг Хятад, Япон зэрэг Азийн оронд уламжлалт анагаах ухааны түүхий эд болгон ашигладаг бөгөөд голдуу бэлгийн чадавхийг сайжруулах зорилгоор хэрэглэдэг гэнэ. Үүнээс гадна астма буюу багтраа, хоолойн халдварт өвчин, арьсны элдэв сорви, шархыг арилгахад ч тустай аж. Тиймээс хүмүүс далайн морийг амьдаар нь хатаагаад буцалсан усанд хандлах юм уу нунтаглаад тан болгож уудаг гэнэ.